Blla Blla Blla "Oversky Ballkanishe Re-form" [2005]

55 минути и 11 секунди распределени во 9 песни. Вистинска музика за вашето префинето рокенрол уво.

Главни протагонисти во оваа приказна наречена Oversky Ballkanishe Re-form се: Идриз Амети, Дејан Еврушоски, Димитар Петров и Влатко Јаневски. Покрај нив, како соработници на албумот се појавуваат и: Љупчо Ангелов, Ермал Скупи и Мимоза Ахмети.

Oversky Ballkanishe Re-form е голем и прекрасен албум, албум преполн со емоции.. и пред се албум типичен за Blla Blla Blla. Со песни низ кој постојано провејуваат надреални и волшебни звуци. Можеш со денови да се загубиш во длабочината на нивните аранжмани и со секое ново преслушување на албумот да пронајдеш нешто ново.

Албумот го отвара мистериозната Ke kujdes (druri im).. која започнува и завршува со детски џагор, а во целиот свој тек.. со својата мрачна мелодија ве остава без здив.

Целиот албум е фантастичен, но како мои фаворити сепак ќе ги издвојам.. духовитата AA dhe VD (одвај чекам да го погледам спотот), веселата Lugat и хитоидната Air-condition.

Одличен е и ремиксот на песната Wolf & Dogs од минатиот албум.. во своето ново психоделично space издание звучи уште подобро отколку што звучеше на нивниот претходен албум.

Ова е албум кој во текот на целото свое времетраење ќе владее со вашите емоции. И не се спротиставувајте, тоа е толку нормално.

Oversky Ballkanishe Re-form претставува вистинско освежување за македонската музичка сцена. Сепак, жално е тоа што поради ограниченоста на публиката во Македонија, ова ремек дело ќе го преслушаат многу малку луѓе. Ама нема врска.. Blla Blla Blla во меѓувреме ќе ја освојуваат Европа. Можеби некогаш и ние ќе научиме што е тоа добра музика? Или не?